Турцыя і сірыйскія апалчэнцы, якіх падтрымлівае Анкара, нарошчваюць сілы ўздоўж мяжы з Сірыяй для магчымага буйнамаштабнага ўварвання на падкантрольную курдам тэрыторыю, расказалі Wall Street Journal (WSJ) высокапастаўленыя амерыканскія чыноўнікі. Увагу на публікацыю звярнула выданне The Moscow Times.
Крыніцы WSJ расказалі, што Турцыя сканцэнтравала вялікую колькасць спецназа і артылерыі побач з сірыйскім горадам Айн-эль-Араб (Кабані), у якім пераважна жывуць курды, і можа пачаць транспамежную аперацыю найбліжэйшым часам.
«Мы сочым за гэтым і заклікаем да стрыманасці», — сказаў адзін з суразмоўцаў выдання.
Нарошчванне сіл, якое пачалося пасля падзення рэжыму Башара Асада, нагадвае дзеянні турэцкіх вайскоўцаў перад уварваннем на паўночны ўсход Сірыі ў 2019 годзе, адзначае WSJ. На гэтым фоне прадстаўніца «Сірыйскіх дэмакратычных сіл» (СДС) Ільхам Ахмед звярнулася да абранага прэзідэнта ЗША Дональда Трампа. Яна папрасіла яго паўплываць на прэзідэнта Турцыі Рэджэпа Таіпа Эрдагана і перадухіліць магчымае ўварванне, мэта якога — «усталяваць фактычны кантроль» над тэрыторыяй курдаў і «змусіць» ЗША да супрацоўніцтва.
Нагадаем, Турцыя разглядае прысутнасць курдскіх фарміраванняў ля сваёй мяжы з Сірыяй як пагрозу. Анкара дзесяцігоддзямі змагаецца з курдскімі сепаратыстамі, якія імкнуцца стварыць уласную незалежную дзяржаву, піша Руская служба Бі-бі-сі.
Турцыя падтрымлівала некалькі паўстанцкіх групаў у Сірыі, у тым ліку «Хаят Тахрыр аш-Шам», якая ачольвала нядаўні наступ на Дамаск.
Анкара падтрымлівала і паўстанцаў з «Сірыйскай нацыянальнай арміі» — групы, якая складаецца з вельмі розных сіл, ад наймітаў да злачынцаў. Такая падтрымка паўстанцаў, як разлічвала Анкара, неабходная была для стварэння буфернай зоны ўздоўж мяжы з Сірыяй — для абароны ад курдскіх баевікоў.