У Новую Баравую, дзе ля «Школы будучыні» бацькі сталі ў чаргу, каб падаць дакументы ў першы клас, прыязджала чыноўніца з Мінскага райвыканкама. Яна заявіла, што колькасць прынятых у школу дзяцей можа змяніцца, піша газета «Прысталiчча».
Нагадаем, жыхары раёна «Новая Баравая» і вёскі Копішча арганізавалі чаргу ля мясцовай «Школы будучыні», дзе ў панядзелак, 12 чэрвеня, пачнуць прымаць дакументы ад сем’яў, дзеці якіх паступаюць сёлета ў першы клас. Колькасць месцаў абмежаваная — усяго 150, а ў прадлёнцы — наогул 80. У выніку бацькі, нацэленыя менавіта на гэтую навучальную ўстанову, яшчэ з вечара суботы дзяжураць ля будынка школы.
Як піша газета «Прысталічча», у 17.30 да чаргавікоў прыбылі намесніца начальніка ўпраўлення па адукацыі Мінскага райвыканкама Наталля Міхадзюк і намеснік дырэктара па навучальнай рабоце школы № 1 вёскі Копішча Святлана Янковіч, каб «разабрацца ў сітуацыі, якая склалася, і адказаць на пытанні бацькоў».
Пры гэтым дзяржгазета неаднаразова звяртае ўвагу на «чорны бусік» (мінівэн), да якога падыходзілі чаргавікі для пераклічкі. У дзяржСМІ іх назвалі «арганізатарамі гэтага флэшмобу». Чыноўніца таксама акцэнтавала ўвагу на «чорным бусіку».
Наталля Міхадзюк патлумачыла, што спіс, які складаюць «людзі на бусіку», — не дакумент, а прыём ва ўстанову пачнецца ў панядзелак, 12 чэрвеня.
— А для чаго вы сюды прыйшлі? Мы камусьці перашкаджаем? — пацікавіўся ў Наталлі Міхадзюк адзін з бацькоў. — У нас да вас пытанняў няма, мы ў жывой чарзе.
Як піша дзяржвыданне, з натоўпу прагучала абурэнне наконт колькасці месцаў у школе для першакласнікаў. Тады намесніца начальніка ўпраўлення па адукацыі Мінрайвыканкама патлумачыла чаргавікам, што колькасць месцаў можа як павялічыцца, так і зменшыцца:
— У студзені мы праводзілі ўсенавуч. Так мы высветлілі, што тут пражывае 150 дзяцей ва ўзросце 6 гадоў, якія могуць сёлета пайсці ўжо ў 1-ы клас у дадзеную ўстанову адукацыі. З заўтрашняга будзем бачыць, колькі ўсяго тут пражывае дзяцей ва ўзросце 6−7 гадоў. Пастараемся даць месца ўсім, але нельга забываць і пра матэрыяльна-тэхнічныя ўмовы школы.
Наталля Міхадзюк таксама сказала бацькам, што аддаць дакументы ў 1-ы клас у гэтую ўстанову адукацыі маюць права законныя прадстаўнікі няпоўнагадовых, якія пражываюць і зарэгістраваныя на тэрыторыі, замацаванай за гэтай установай адукацыі.
Акрамя таго, бацькоў хвалявала і колькасць месцаў у групу падоўжанага дня, бо ў яе набяруць не ўсіх ахвочых.
— Калі давядзецца павялічваць колькасць класаў, а таксама навучэнцаў у іх, то, магчыма, давядзецца скарачаць і групу падоўжанага дня. Аднак гэта ўсё яшчэ вырашаецца, — падкрэсліла Наталля Аляксандраўна.
Таксама бацькі паднялі яшчэ адно набалелае пытанне — будаўніцтва новай школы. Як выявілася, яе плануюць адкрыць толькі 1 верасня 2025 года
Пры гэтым бацькі заявілі, што не плануюць разыходзіцца.
— Мы нікому не перашкаджаем, усе ўжо пазнаёміліся і нядрэнна бавім час, — запэўніў чалавек з натоўпу.