Па ўсёй Беларусі ўжо некалькі дзён сілавікі праводзяць ператрусы ў былых назіральнікаў за прэзідэнцкімі выбарамі 2020 года. Кампанію запалохвання арганізуе Камітэт дзяржаўнай бяспекі, паведамляе праваабарончы цэнтр «Вясна».
Праваабаронцы паведамляюць, што ў былых назіральнікаў правяраюць тэлефоны і папярэджваюць пра крымінальную адказнасць за «садзейнічанне экстрэмісцкай дзейнасці». З імі таксама запісваюць «пакаяльныя» відэа.
Праваабаронцы лічаць, што гэта чарговая атака на грамадзянскую супольнасць як помста за актыўнасць усіх незалежных назіральнікаў на выбарах 2020 года.
На цяперашнюю выбарчую кампанію «Праваабаронцы за свабодныя выбары» абвясцілі пра запуск экспертнай місіі па назіранні за выбарамі без разгортвання сеткі назіральнікаў.
«Мы цяпер вядзём экспертную місію назірання, бо былі ўпэўненыя ў тым, што будуць рэпрэсіі ў дачыненні да праваабаронцаў і валанцёраў. А цяпер яны пачаліся нават без усякай нагоды. Гэта наступствы павышэння ўзроўню рэпрэсій напярэдадні выбараў, яны так ці інакш закрануць усіх палітычна і сацыяльна актыўных людзей», — заявіў праваабаронца «Вясны» Павел Сапелка.