У Белгародскай вобласці пацярпеў крушэнне вайскова-транспартны самалёт Іл-76. Пра гэта паведамляюць расійскія СМІ са спасылкай на Міністэрства абароны РФ.
Як вынікае з паведамлення, Іл-76 пацярпеў крушэнне каля 11.00 паводле маскоўскага часу. На яго борце знаходзіліся 65 палонных вайскоўцаў УСУ, якія перавозіліся ў Белгарадскую вобласць для абмену, шэсць чальцоў экіпажа самалёта і трое суправаджальнікаў.
На месца падзення вылецела камісія ВКС для высвятлення прычын катастрофы.
Між тым «Украінская праўда» са спасылкай на сваю крыніцу напісала, што самалёт перавозіў ракеты для ЗРК С-300, а яго падзенне — гэта праца УСУ. Аднак неўзабаве выданне выдаліла інфармацыю, што да крушэння датычныя УСУ.
Афіцыйна ўкраінскі бок здарэння пакуль не каментаваў.
Раней расійскія тэлеграм-каналы публікавалі, як сцвярджаецца, відэа падзення самалёта, паведамляючы, што ён быў збіты, а губернатар Белгародскай вобласці Вячаслаў Гладкоў напісаў пра «здарэнне ў Карачанскім раёне».
Іл-76 — савецкі і расійскі цяжкі вайскова-транспартны самалёт, прызначаны для транспартавання тэхнікі і грузаў рознага прызначэння. На яго базе ствараўся А-50, які нядаўна быў збіты над Азоўскім морам.